Azərbaycanın Təhsil Nazirliyi Elekton təhsil resurslarının qiymətləndirilməsi üzrə Şuranın fəaliyyət istiqamətlərini müəyyən edib. Bu barədə nazirliyin məlumatında deyilir.

Nazirliyin qərarına görə, şuranın fəaliyyəti nazirlik yanındda fəaliyyət göstərən Təhsil sisteminin informasiyalaşdırılması İdarəsi ilə uyğunlaşdırılacaq.

"2008-2012-ci illərdə təhsil sisteminin informasiyalaşdırılması üzrə Dövlət Proqramı" çərçivəsində yaradılmış şuranın əsas məqsədi elektron təhsil resurslarının beynəlxalq standartlara uyğun qiymətləndirilməsi, bu resursların təhsil portalında yerləşdirilməsi və onların daha səmərəli istifadəsidir.

Elektron resurslarının qiymətləndirilməsi üzrə Şura öz fəaliyyətində beynəxalq təcrübədən geniş istifadə edəcək.

Şuranın tərkibinə Rabitə və İnformasiya Texnologiyaları Nazirliyinin, Kibernetika İnstitutunun, "Mədəd" Humanitar Təşkilatının, "Azedunet" təşkilatının və "Microsoft Azerbaijan" şirkətinin, o cümlədən qeyri-hökumət təşkilatlarının nümayəndələri və müəllimlər daxildir.